O muro de Rosalía

muro ROsalía 80 - copiaNaceu o curso pasado como símbolo dos prexuízos, para acoller o poema de Carlos Negro, O muro, que forma parte da súa obra Masculino singular, da cal nos servimos o curso pasado para abordar a loita contra o machismo no marco do 25N.

Acabou coverténdose no muro de Rosalía e soporte de todas as intervencións realizadas no IES Félix Muriel arredor das datas sinaladas no calendario escolar: día de Rosalía, día da lingua nai, Entroido, día da poesía, día das artes galegas, 25 de abril… Aos seus pés, damos lectura a poemas e manifestos.

Hoxe é xa a icona do noso instituto.

Semana Solidaria do IES Félix Muriel

Baixo o lema Ti tamén sumas, o noso instituto ten programada unha semana de actividades, obradoiros, charlas, proxeccións e teatro adicada á solidariedade.

Cruz Vermella, Médicos Sen Fronteiras, A CREBA, AMiPA, a Fundación Paideia ou o Centro de Educación Especial de Vilagarcía son algúns dos colectivos que participarán nestas actividades.

A programación destas actividades solidarias correu a cargo dos Departamentos de Ciclos de Formación Profesional e de Orientación.

Para dar a coñecer estas actividades o IES Félix Muriel lanzou unha campaña nas redes sociais na procura da madriña ou padriño para esta iniciativa. Múltiples artistas coñecid@s enviaron xa os seus vídeos, que están a ter unha magnífica acollida na rede. AQUÍ VOLOS DEIXO

Podes seguir a nova na prensa: SERMOS GALIZA

Podes descargar a programación en pdf aquí: Programa_Actividades_Semana_Solidaria_Ti_Tamén_Sumas


PODES SEGUILA NO FEISBÚ

Charla con Suso de Toro

 

Suso de Toro veu charlar co alumnado que reinterpretou a súa obra

O escritor Suso de Toro, despois de ver os traballos audiovisuais realizados polo alumnado de 1º de Bacharelato sobre a súa obra Tic-Tac, accede a vir ao instituto rianxeiro para coñecelos e charlar con eles.

Unha das máis famosas obras do escritor compostelán, Tic-Tac, vén de cumprir vinte anos. Mais a súa  modernidade parece perdurar no tempo, así o demostraron as lecturas que dela fixeron os e as alumnas de 1º de Bacharelato do IES Félix Muriel de Rianxo. De feito, o autor da citada obra, que xa rexeitara varios convites que se lle fixeran desde o centro para vir dar unha charla ao alumnado, comunicou que –logo de ver o, segundo el, “impresionante traballo realizado” non se podía negar.

E así foi. Este martes 28 de xaneiro foi a cita no salón de actos do IES onde falou para todos os grupos de bacharelato do centro. Antes aínda lle deu tempo a pasar pola biblioteca onde, coma cada día desde o pasado xoves 23 ata o vindeiro xoves 30, se realizan as proxeccións dos 62 traballos entregados. Hoxe tocáballe a un dos mellores, un vídeo do alumno Eduardo Domínguez, no que, durante 20 minutos, mostraba unha colección de citas da obra combinadas con imaxes e música escollidas polo autor e que axudaban a explicar o seu significado.

Durante máis de media hora, Suso de Toro, cautivou aos seus oíntes falándolles non só de Tic-Tac, de como nacera, do seu significado… senón tamén de era el de adolescente, do conxunto da súa obra e incidindo no que significa para el a escrita. Logo o público podía facer preguntas que foron contestadas polo autor aclarando cuestións que foron desde o título da obra que o deixara máis satisfeito ata o significado de “Apoteose do churrasco” en Polaroid.

GRAZAS, TINA!