Inaugúrase en Bos Aires a cátedra Galicia-América apadriñada por Manuel Rivas

Coincidindo coa Feira do Libro de Bos Aires inaugúrase o vindeiro martes 26 a Cátedra Galicia-América na Universidade Nacional de San Martín apadriñada por Manuel Rivas. Con esta xa son tres as cátedras de estudos galegos que operan na cidade porteña.

FONTE DE INFORMACIÓN: SERMOS GALIZA

Só dúas bandas galegas superan os 100.000 seguidores en redes sociais

Só os ourensáns Los Suaves superan a barreira de 100.000 seguidores. Detrás del están outros artistas consolidados, como Iván Ferreiro (case 88.000) e dúas referencias xa clásicas do folc: Carlos Núñez (+61.000) e Luar na Lubre (+50.000). Por detrás está o coruñés Xoel López (+38.000), a gaiteira Cristina Pato (case 22.000), que residen en Nova York, ou a banda coruñesa tributo a Dire Straits Brothers in Band (case 20.000).

A continuación xa aparecen nomes da canción en galego, como SES (+16.000) ou Dakidarría (+14.000), xunto con Novedades Carmiña (+12.700), Heredeiros da Crus (case 12.500) e Woyza (12.455). Non incluímos Berrogüetto, por ser unha banda desaparecida, pero que aínda vive no Facebook con máis de 17.000 seguidores.

Nos números dos grupos en galego nótase que seguen á marxe das radiofórmulas, con escasos apoios mesmo nos medios do país e dificultades para saír ao exterior. SES é un dos poucos exemplos nos que existe o fenómeno ‘fan’ na cultura galega e mantén unha intensa actividade en redes sociais para conectar co seu público. Ela sería a primeira nesta listaxe, seguida de Dakidarría e os barbanceses Heredeiros da Crus. Logo estarían os coruñeses que fan fusión Chotokoeu (+9.500), Terbutalina (+6.000), Xabier Díaz (+5.600) ou o grupo vocal De Vacas, con máis de 5.000 seguidores en menos dun ano de traxectoria.

FONTE DE INFORMACIÓN: SERMOS GALIZA

Michigan (EE.UU.) convértese na capital internacional do galego por uns días

EE.UU volve ser o centro dos estudos galegos no mundo. Este mércores inaugurouse o II Simposio de Estudos Galegos , que é unha continuación do primeiro congreso, organizado polo Galician Studies Research Group da University of Wisconsin-Milwaukee en maio del 2014.

Este segundo encontro celébrase na University of Michigan-Ann Arbor e ten como obxectivo reunir os investigadores e profesores que traballan no campo dos Estudos Galegos no seu máis amplo sentido e desde calquera aproximación disciplinar ou multidisciplinar. Precisamente, neste congreso, os organizadores valoraron especialmente as achegas “desde reflexións teóricas innovadoras, desde diferentes interseccións xeográficas”, e asemade os traballos que “recuperen, revitalicen ou dean visibilidade tanto á tradición cultural galega coma á produción máis recente desde un compromiso ó achegamento político do estudo da cultura”.

FONTE DE INFORMACIÓN: GALICIA CONFIDENCIAL

Que se vexa! O galego

Por segundo ano consecutivo a CTNL propón de novo Que se vexa o galego!, porque…

Queremos unha lingua viva, útil, moderna, atractiva, visible. Queremos un idioma para tod@s. E queremos que se vexa! E a celebración das Letras Galegas debe servir para contribuír a visibilizar a lingua en todos os ámbitos e a dar unha imaxe máis moderna e atractiva do noso idioma.

Por iso, desde a Coordinadora de Traballadores/as de Normalización da Lingua (CTNL) propómoslles a todas as entidades que os programas, imaxe, actividades, discursos, etc., que se fagan arredor do Día das Letras Galegas teñan isto en conta, e sirvan tamén para transmitir esa imaxe de lingua viva, útil, moderna e atractiva para tod@s e en todos os ámbitos e situacións sociais. Deste xeito, propomos de novo o lema QUE SE VEXA! O GALEGO e un sinxelo logo e ofrecémolos de xeito libre para que os utilice calquera persoa ou entidade.

Ademais, gustaríanos coñecer e poder difundir todas esas actividades que se fan para darlle protagonismo ao idioma e para destacar que é unha lingua viva e rica válida para todos os ámbitos e situacións. Queremos coñecer e espallar propostas para Que se vexa! O galego

[Podes enviar información sobre actividades para Que se vexa! O galego a info@ctnl.gal]

FONTE DE INFORMACIÓN: CTNL

Primavera das Letras

A Real Academia Galega acaba de poñer en marcha Primavera das Letras, un proxecto co que pretende axudar o profesorado no importante labor que desenvolve arredor do Día das Letras Galegas. A cerna desta iniciativa é unha páxina web, academia.gal/primaveradasletras, desde a que se fornecerá os centros de ensino de distintos recursos didácticos, dirixidos sobre todo ao alumnado de infantil e primaria, aínda que tamén haberá actividades e outros contidos útiles para traballar co alumnado de secundaria.

A traxectoria de Manuel María, o escritor que será homenaxeado no Día das Letras Galegas de 2016, e o seu universo literario son os protagonistas de boa parte das fichas didácticas coas que bota andar este proxecto, nas que tamén se introduce o alumnado na historia do Día das Letras Galegas.

Un dos obxectivos de Primavera das Letras é promover que a aprendizaxe arredor do Día das Letras Galegas non se limite aos días previos ao 17 de maio.

Para saber máis:  academia.gal